النوم الطبيعى (مراحل النوم ودورة النوم)

السلام عليكم ورحمة الله وبركاته

...........................

نظرا لأسئلتكم الكثيرة عن كيفية الوصول الى نوم صحى ومثالى
فبدأت فى هذه التدوينات
.
ولانى وجدت كثيرا منكم يعانى من مشاكل متعددة فى النوم
سواء :
-طبيعة النوم
-توقيت النوم
-عدد ساعات النوم
-تقطع أثناء النوم
.
فلذلك احببت أن أفصل لكم شيئا يسيرا عن كيفية حدوث النوم بشكل طبيعى وحيوى
حتى اتمكن من عرض المشاكل والحلول على اساس علمى مبسط باذن الله

مراحل النوم

الطبيعى ان الانسان بينام فى المتوسط من 6 الى 8 ساعات يوميا

فيبقى المتوسط حوالى 7 ساعات

فلو أن متوسط عمر الانسان 60 سنة ,فبيكون قضى حوالى من 20 الى 25 سنة نوم

فى خلال فترة النوم ده كلها بنحلم حوالى 6 سنين فقط

يعنى فترة بسيطة جدا.

.

لما الانسان بينام كويس ..بيدخل فى دورة النوم

ودورة النوم الكاملة مدتها 90 دقيقة أو ساعة ونص

عشان كدة الأفضل اننا نخلى نومنا على مضاعفات الساعة ونص

يعنى 3 ساعات

او اربع ساعات ونص

أو 6 ساعات ,,,,وهكذا,

.

ده أول وأهم معلومة .

,,

والجاى برضه مهم جدا

بس ركزوا معايا,,

.

الانسان أثناء نومه بيمر بعدة مراحل,,وهى كالتالى:-

1)مرحلة النوم مع عدم حركة العين (NREM)

2)مرحلة النوم مع حركة العين(REM)

بعد كدة المرحلة الأولى ده يتتقسم الى 3 أو 4  مراحل على اختلاف تقسيمات كتب الفسيولوجى (علم وظائف الأعضاء) وكتب علم النفس.

1-مرحلة النوم الخفيف:-

   

وهى أول مرحلة , وبتستغرق من 5 الى 10 دقائق.

وهى بداية النوم غالبا فى الكبار ,, ولكن غالبا مش بتكون موجودة فى الأطفال حديثى

 

الولادة,, بيناموا اصلا على نفسهم :)

فى المرحلة ده بيحس الانسان كأنه ينجرف الى السبات ,, تحدث فيها انقباضات خفيفة للعضلات ( بنشوفها كتير فى أطفالنا وبنقلق منها ,, لكن بتحصل معانا احنا كمان لو خدنا بالنا)

أحيانا بتكون مصحوبة بشعور انك هتقع من فوق السرير مثلا ,, ولكن ده احساس فقط لانها بتكون مرحلة شبيهة بالحلم

المخ فى المرحلة ده بيكون فى كامل نشاطه , وسهل انك تصحى من النوم مع اى منبه أو ازعاج حواليك.

,

,

2-مرحلة بداية النوم:-

والمرحلة ده بتستغرق حوالى 20 دقيقة

الانسان بيكون غير واعى بأى حاجة بتحصل حواليه , لأن المخ بيبدأ يقلل نشاطه بالتدريج ,, وعشان الانسان يصحى فى المرحلة ده محتاج منبه أقوى من المستخدم فى المرحلة السابقة.

وهنا بتبدأ تحصل التغيرات الفيسيولوجية بتاعة النوم زى : انخفاض درجة حرارة الجسم وانتظام معدل التنفس وضربات القلب.

المرحلة ده بتكون مهمة جدا لتنشيط ذاكرة الانسان ,فوجدوا أثناء الأبحاث أن الانسان اللى بيتعلم مهارة جديدة بيكون عنده نشاط زائد فى كهرباء المخ فى المرحلة ده أكثر من الانسان العادى اللى عايش حياته بنفس الروتين.

.

عشان كدة دايما نقول للطلبة ,, "مهم جدا تناموا كويس ليلة الامتحان.

فى المرحلة ده ممكن الانسان يحلم أحلام بسيطة وقصيرة جدا ,,

.

3-الدخول فى النوم العميق:-

المرحلة ده بتستغرق دقائق بسيطة لا تتعدى خمس دقائق

هنا بيحصل الانتقال من النوم الخفيف الى النوم العميق

واثناء متابعة الرسم الكهربائى للمخ , وجدوا بداية ظهور موجات سريعة وبطيئة فى نفس الوقت.

فى المرحلة ده بيكون صعب جدا انك تصحى الانسان النائم ,,لانه بيكون دخل فى بداية النوم العميق.

.

4-المرحلة التانية من النوم العميق:-

أهم مراحل النوم وهى بتستغرق حوالى من 20-40 دقيقة

فى المرحلة ده بيحصل ارتخاء تام لعضلات الجسم ,, وانخفاض لمستوى ضغط الدم.

وهنا المخ بيسجل موجات بطيئة فقط على رسم المخ الكهربائى.

والمرحلة ده من النوم مهمة جدا ,,لأنه بيحصل فيها مجموعة من العمليات الحيوية اللى بيحتاجها الجسم,,

اللى ممكن نسميها  "عملية الشحن"

فبيحصل تخزين للطاقة , ونمو فى الانسجة , والتئام الجروح والانسجة ومقاومة الالتهابات المزمنة ايضا.

وعشان كدة أثبتت أغلب الدراسات الحديثة أن قلة النوم بيقلل مناعة الجسم.

.

ومع كل المزايا ده فبنلاقى برضه شوية مشاكل ممكن تحصل فى المرحلة ده,,

فلأن الانسان بيكون دخل فى نوم عميق جدا ,,وتقريبا العقل الواعى رافع الراية البيضاء

والعقل اللاواعى هو اللى ماسك زمام الأمور,,

.

فبنلاقى ان المرحلة ده هى اللى بيحصل فيها:-

• التبول اللا ارادى عند الأطفال
•  الكوابيس المرعبة 
• أو المشى أثناء النوم.

الأحلام فى المرحلة ده بتكون مجرد احاسيس فقط أو ألوان.

.

5-مرحلة حركة العين السريعة (REM):-

والمرحلة ده بتمثل حوالى 20-25% من دورة النوم كاملة.

تتحرك العين فى هذه المرحلة حركات سريعة جدا ,,ذهابا وايابا.

المخ يكون فى كامل نشاطه.

ولكن الجسم بيكون ساكن تماما , والعضلات مرتخية أيضا.

وهى ده مرحلة الاحلام العجيبة ,, اللى بتكون مليانة تفاصيل كتيرة.

لو الانسان صحى من النوم وهو فى المرحلة ده سهل جدا انه يفتكر الحلم اللى كان بيحلمه.

فى ناس كتير بتقول انا عمرى ما باحلم

بس الحقيقة العلمية بتقول ان الانسان الواحد بيحلم بحوالى 1460 حلم فى السنة ,, بمتوسط 4 احلام كل ليلة.

الفكرة انك مش بتفتكر الحلم,,

لكن لو صحيت فى مرحلة حركة العين السريعة ,, وهى غالبا بتكون فترة قصيرة هتفتكر الحلم وبتفاصيله كمان.

.

ممكن فهم المراحل عن طريق الشكل الموضح

بغض النظر عن اختلاف التسميات.

ده كدة مراحل النوم,,

.

بالنسبة لدورة النوم

دورة النوم

 فهى تماما زى الشكل الموضح

وزى ما قلت فى البداية دورة النوم بتستغرق حوالى 90 دقيقة أو ساعة ونصف

والدورة بتتكون من المراحل الاتية

1-      النوم الخفيف

2-      بداية النوم

3-      المرحلة الأولى من النوم العميق

4-      المرحلة التانية من النوم العميق

5-      المرحلة الأولى تانى من النوم العميق

6-      بداية النوم ( وهنا نهاية النوم العميق)

7-      مرحلة حركة النوم السريعة

كدة دورة النوم خلصت

ممكن تتكرر تانى لو كملت نوم ,, وممكن تقف عند كدة

الانسان عشان يقوم من النوم فايق ونشيط محتاج حوالى 4 أو خمس دورات من النوم ده اثناء الليل.

.

وبكدة انتهت تدوينتى لليوم,,

.

وانتظرونى فى التدوينة القادمة لنصائح لنوم أفضل.

.

يمكن مطالعة هذه التدوينة ,,كتبتها منذ عامين تقريبا ولكن فيها فوائد جيدة

http://yalla-net3allem-se7a.blogspot.com.eg/2014/12/blog-post_28.html

 المراجع والمصادر:

physiology textbooks

http://livewellnetwork.com/Steven-and-Chris/episodes/Sleep-

Cycle-101/8983016

http://www.ncbi.nlm.nih.gov/books/NBK19956/